نورتي منتدانا المتواضع
ياريت تكوني ويانا علي الحق مجمعين


 
الرئيسيةبحـثالتسجيلدخول




شاطر | 
 

 عايزاكى تقطعى ابنك من الضرب!!

اذهب الى الأسفل 
كاتب الموضوعرسالة
ريماس ساجدة

avatar

عدد المساهمات : 247
تاريخ التسجيل : 08/02/2014

مُساهمةموضوع: عايزاكى تقطعى ابنك من الضرب!!   الثلاثاء 11 فبراير 2014 - 23:45



السلام عليكم ورحمة الله


عايزاكى تقطعى ابنك من الضرب !
وتهريه وتكسرى عضمه كمان عشان يتربى


بس مترجعيش تشتكى ان ابنك عدوانى وعنيف
وبيضرب العيال الاصغر منه على اتفه الاسباب
او كبر ومبقاش يسمع الكلام والضرب مبقاش يأثر فيه!
او بقى ماهر جدا فى الكذب عشان يبرر افعاله الغلط ، وغبى جدا فى دراسته !!

لان للاسف هى دى نتيجة الضرب!

الضرب بيجيب نتيجة.. بس بتكون وقتية يعنى هيسمع كلامك فى لحظتها بس

عشان (خايف) مش عشان بقى عنده (الدافع) انه ميعملش الغلط !
وعدم وجود الدافع هيخليه يكرر الخطأ ولو من وراكى!


تعرفوا العيل اللى بيضرب الاصغر منه بيعمل كدة لية ؟
لان كل اللى اتعلمه من ضربك ليه ان الكبير بيضرب الصغير والقوى بيفرد عضلاته ع الضعيف ..
ولانه مجربش طريقة تانية اساسا للتعامل مع طلباته غير بالضرب !
تعرفوا ان بعض الدراسات بتقول (( صفعة واحدة كل اسبوعين تكفى للقضاء على ذكاء الطفل ) !
لان هيخلى كللل تركيزه فى انه يستخبى منك لما يحب يعمل الحاجة اللى بتضربيه عشانها
او يوجه كل ذكاؤه فى تبرير أخطاؤه !!
لا برضو اياكى تشتمى

لانك لو قلت مثلا لطفلك يا (غبى ) هيطلع غبى او هيتغابى لانك اقنعتيه انه غبى
الطفل مش بيكون عنده قدرة على نقد الكلام اللى بيتقال
فهيصدق انه غبى وهيتصرف بكل غباء وبلاهة
وهيقل احترامه لنفسه وثقته بقدراته

وكذلك لو قلتى ( انت مهمل ،بليد ، ...الخ)
دايما انتقدى الفعل مش الطفل

يعنى لو مش راضى يدى اخوه حاجة قوليله (كدة انانية) مش تقولى (انت أنانى) !

لو فهمتيه براحة بقى وبالمنطق ومجاش برضو بالذوق ؟
هتعملى اية ؟ هتجربى درجات العقاب واحدة واحدة وبراحة
وحاولى وجاهدى انك مطبقيش عقاب جامد
احفظى العقاب الجامد ع الغلطات الجامدة(عشان يفرق بين درجات اخطاؤه برضو)

عندنا بقى درجات العقاب:

1-النظرة الحادة والتكشيرة التمام

2- الحرمان (خروجة -لعبة -كرتون -مصروف ..الخ)

3-الخصام (ايوه خاصميه اشمعنى بتخاصمى ابوه )

3-الزعيق (بدون شتيمة ) قولى (كدة غلط)


4- مش عاوزة أقول الضرب ..بالله عليكم تجنبوه على أد ما تقدروا

ده الرسول -ص- خلى الضرب على الصلاة بعد تعليم وصبر 3 سنين !!
مش انتى فى ساعتها صبرك ينفد وتقولى هو انا فاضية للفتوكة دى وتروحى ضاربة !

وافتكرى انهم أمانة تحت ايديكى وكلكم راع وكلكم مسئول عن رعيته
والزمى الدعاء ف صلاتك بأن ربنا يرزقك حسن تربيتهم

فى دراسات ان غالبية اللى بيضربوا عيالهم بيكونوا اتعرضوا للضرب وهما صغيرين
فبلاش نطلع عقدنا على أطفالنا ربنا يكرمكم



الرجوع الى أعلى الصفحة اذهب الى الأسفل
 
عايزاكى تقطعى ابنك من الضرب!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: أقسام الصحة و الرشاقة :: صحة المرأة :: امهات المستقبل-
انتقل الى: